Shachinandana Vijaya Ashtakam in Telugu

॥ Shachinandana Vijaya Ashtakam Lyrics in Telugu ॥

శ్రీశచీనన్దనవిజయాష్టకమ్

గదాధర యదా పరః స కిల కశ్చనాలోకితో

మయా శ్రితగయాధ్వనా మధురమూర్తిరేకస్తదా ।

నవామ్బుద ఇవ బ్రువన్ ధృతనవామ్బుదో నేత్రయో-

ర్లుఠన్ భువి నిరుద్ధవాగ్విజయతే శచీనన్దనః ॥ ౧ ॥

అలక్షితచరీం హరీత్యుదితమాత్రతః కిం దశాం

అసావతిబుధాగ్రణీరతులకమ్పసమ్పాదికామ్ ।

వ్రజన్నహహ మోదతే న పునరత్ర శాస్త్రేష్వితి

స్వశిష్యగణవేష్టితో విజయతే శచీనన్దనః ॥ ౨ ॥

హా హా కిమిదముచ్యతే పఠ పఠాత్ర కృష్ణం ముహు-

ర్వినా తమిహ సాధుతాం దధతి కిం బుధా ధాతవః ।

ప్రసిద్ధ ఇహ వర్ణసఙ్ఘటితసమ్యగామ్నాయకః

స్వనామ్ని యదితి బ్రువన్విజయతే శచీనన్దనః ॥ ౩ ॥

నవామ్బుజదలే యదీక్షణసవర్ణతాదీర్ఘతే

సదా స్వహృది భావ్యతాం సపది సాధ్యతాం తత్పదమ్ ।

స పాఠయతి విస్మితాన్ స్మితముఖః స్వశిష్యానితి

ప్రతిప్రకరణం ప్రభుర్విజయతే శచీనన్దనః ॥ ౪ ॥

క్వ యాని కరవాణి కిం క్వ ను మయా హరిర్లభ్యతాం

తముద్దిశతు కః సఖే కథయ కః ప్రపద్యేత మామ్ ।

ఇతి ద్రవతి ఘూర్ణతే కలితభక్తకణ్ఠః శుచా

స మూర్చ్ఛయతి మాతరం విజయతే శచీనన్దనః ॥ ౫ ॥

స్మరార్బుదదురాపయా తనురుచిచ్ఛటాచ్ఛాయయా

తమః కలితమఃకృతం నిఖిలమేవ నిర్మూలయన్ ।

నృణాం నయనసౌభగం దివిషదాం ముఖైస్తారయన్

లసన్నధిధరః ప్రభుర్విజయతే శచీనన్దనః ॥ ౬॥

అయం కనకభూధరః ప్రణయరత్నముచ్చైః కిరన్

కృపాతురతయా వ్రజన్నభవదత్ర విశ్వమ్భరః ।

యదక్షి పథసఞ్చరత్సురధునీప్రవాహైర్నిజం

పరం చ జగదార్ద్రయన్విజయతే శచీనన్దనః ॥ ౭ ॥

గతోఽస్మి మధురాం మమ ప్రియతమా విశాఖా సఖీ

గతా ను బత కిం దశాం వద కథం ను వేదాని తామ్ ।

ఇతీవ స నిజేచ్ఛయా వ్రజపతేః సుతః ప్రాపిత-

స్తదీయరసచర్వణాం విజయతే శచీనన్దనః ॥ ౮ ॥

ఇదం పఠతి యోఽష్టకం గుణనిధే శచీనన్దన

ప్రభో తవ పదామ్బుజే స్ఫురదమన్దవిశ్రమ్భవాన్ ।

తముజ్జ్వలమతిం నిజప్రణయరూపవర్గానుగం

విధాయ నిజధామని ద్రుతమురీకురుష్వ స్వయమ్ ॥ ౯ ॥

ఇతి శ్రీవిశ్వనాథచక్రవర్తిఠక్కురవిరచితస్తవామృతలహర్యాం

శ్రీశచీనన్దనవిజయాష్టకం సమ్పూర్ణమ్ ।